Перадсвяточная сустрэча ў Чырвоным касцёле

Напярэдадні свята Божага Нараджэння ў касцёле святых Алены і Сымона адбылася Святая імша, у якой удзельнічалі вікарны біскуп Антоній Дзем’янка, настаяцель Чырвонага касцёла ксёндз-магістр Уладзіслаў Завальнюк, іншыя каталіцкія святары і прыхаджане.

Пад час імшы гучалі малітвы і словы віншаванняў са святам Божага Нараджэння, як адной з найвялікшых падзей за ўсю гісторыю чалавецтва. Словы вінашванняў змянялі калядныя спевы, якія распавядалі біблейскую гісторыю пра маленькага Езуса, які прыйшоў у гэты свет для таго, каб выратаваць чалавецтва...

Пасля імшы ўсіх яе ўдзельнікаў, прыхаджан запрасілі на святочны пачастунак з гарбатай і печывам. Але спачатку святары з шчырымі словамі віншаванняў ўручылі усім прыхаджанам і гасцям касцёла традыцыйныя асвечаныя аплаткі. Гучала святочная музыка ад каляднага гурта, якая спрыяла высокаму душэўнаму стану перадсвяточнай сустрэчы.

У гэтай бяседзе прынялі ўдзел і сябры клуба “Спадчына”, якія, скарыстаўшысь нагодай, мелі размову з вікарным біскупам А. Дзем’янкам. Тэмай абмеркавання была магчымасць дапамогі Каталіцкага касёла ў Беларусі ў справе ўшанавання памяці выдатнага дзеяча Нацыянальнага руху, каталіцкага святара В. Гадлеўскага, растралянага фашыстамі на ўскрайку Мінска. Біскуп выказаў зацікаўленасць у вырашэнні пастаўленых пытанняў, якія патрабуюць далейшага абмеркавання і ўзгаднення.

Анатоль Мяльгуй